Դեսպան Վ. Աֆյանի այցելությունը Գվալիոր

10 նոյեմբերի, 2024

2024թ. նոյեմբերի 9-10-ը Հնդկաստանում ՀՀ դեսպան Վահագն Աֆյանը դեսպանության խորհրդականների հետ այցով գտնվել է Հնդկաստանի Մադհյա Պրադեշ նահանգի Գվալիոր քաղաքում, որտեղ հանդիպումներ են կայացել նահանգի ոլորտային նախարար Պրավյուման Սինգհ Տոմարի, հետևակային բրիգադի գեներալ Շիրշենդու Մուկերջիի և Սկինդիա դպրոցի տնօրեն Աջայ Սինգհի, ինչպես նաև Սկինդիա հետազոտական կենտրոնի ղեկավար Արունանշ Բ. Գոսվամիի հետ:

Դեսպան Վ. Աֆյանն այցելել է նաև Գվալիորի զինվորական Ալիջահ ակումբ՝ 1844թ. հիմնադրված հայազգի բրիգադի գեներալ Հակոբ Պետրոսյանի (Jacob Petrus) կողմից, որը 2023-24թթ. վերանորոգվել է Շիրշենդու Մուկերջիի ջանքերով: Այդ առթիվ կազմակերպված միջոցառմանը որպես տվյալ վայր երբևէ Հայաստանից ժամանած առաջին այցելու ՀՀ դեսպանն իր երախտիքի խոսքերն է ուղղել հնդկական կողմին՝ մի քանի հարյուրամյա համատեղ գործակցության պատմական արժեքները պահպանելու, վերականգնելու և նոր սերունդներին ավանդելու համար: Իր խոսքում ՀՀ դեսպանը նշել է նաև Գվալիորում հայտնի մեկ այլ հայազգի գործչի՝ նկարիչ Սարգիս Խաչատուրյանի մասին, ով 1930-40թթ. հյուրընկալվել է տեղի իշխանական Սկինդիա տոհմի մահառաջայի կողմից և վրձնին հանձնել ներկայումս Հայաստանի ազգային պատկերասրահում պահվող նշանավոր Աջանտայի քարանձավների որմնանկարները, որոնց պատկերային աշխատանքներն ընթացիկ տարվա հուլիսին ցուցադրվեցին Նյու Դելիում՝ ՅՈւՆԵՍԿՕ-ի Համաշխարհային ժառանգության կոմիտեի 46-րդ նստաշրջանի ընթացքում:

Նահանգի ոլորտային նախարար Պ. Ս. Տոմարի հետ հանդիպմանը մտքեր են փոխանակվել, ի նշանավորումն հայզգի ռազմական գործչի և Գվալիորի ժամանակի հայ համայնքի ունեցած դերակատարության, հայ-հնդկական բարեկամության այգի հիմնադրելու, ինչպես նաև մասնավոր հատվածի միջև կապեր ստեղծելու հնարավորությունների շուրջ:

Սկինդիա դպրոցի տնօրենի հետ հանդիպմանը քննարկումներ են եղել հնարավոր համագործակցության հաստատմանն ուղղված քայլերի վերաբերյալ:

Այցելություններ են կազմակերպվել նաև քաղաքային ինքնակառավարման մարմնի Սկինդիա կայսերական ընտանիքի պալատական թանգարան և Գվալիորի ամրոց, քննարկվել՝ հետագա համատեղ մշակութային միջոցառման կազմակերպչական հարցեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր